Tøff sesongstart for G19

Juniorane var svekka av ein skuleklasse på tur til Spania, noko som betydde 6 mann vekke. I tillegg var ei handfull til også utilgjengelege til kamp, men sjølv om Halsnøy ikkje bidreg så langt i årets juniorsamarbeid, så har vi ein brei stall og mønstra 15 mann til kamp. Rett nok var 5 av dei gutespelarar, men det gror godt i yngre rekkjer, så det er ikkje noko problem.

Sterk kamp av Rosendal sin G16-keeper Olav Lernes.

I første omgang var bortelaget eit hakk og to betre og dei stressa kvinnheringane i dei fleste situasjonar. Dermed vart det ikkje nok tid til å få til spelet vi veit gutane kan. Bortelaget var solide, både fysisk sterke og raske og godt organisert, med god struktur i både defensivt og offensivt spel. Så mange store sjansar kom dei likevel ikkje til, men ti minutt ut i omgangen hadde dei to headingar i tverrliggjar etter ein corner. Og etter halvtimen kom 0-1 då venstre kantspelar skar inn og overlista ein særs god keeper, Olav Lernes.

TRH hadde beste sjansen på ein overgang der Martin Veastad kom inn frå høgre, men frå skrå vinkel gjekk skotet rett på keeper. 0-1 midtvegs var rett og rimeleg. Men etter ein peptalk kom laget sterkare ut. Utover i andre omgang klarte kvinnheringane å rive til seg eit initiativ. Det gjekk raskare i lengderetning og vi traff betre med pasningane. I denne perioden vart det skapt fleire gode sjansar: Skot rett utanfor frå Dawit Kahsay, Emanuel Onasaka fekk nesten kontroll på ballen åleine mot mål, og Simen Røssland med ein susar av eit langskot. Men det vart med nesten.

Warhel Suleman var TRH sin bestemann i dag.

Mot slutten kjempa bortelaget seg inn i det igjen og demma godt opp bak. TRH tok større sjansar bak i von om utlikning og ein forsvarsmiss sendte Bergen Nord-spissen åleine gjennom. Med 5 minutt att på klokka punkterte han kampen sikkert. På overtid fekk dei også 0-3 på straffe etter ei unødvendig felling.

' 

Alt i alt ein fortent siger til salhusarane. Men ein må ta med seg ei fin heving i andre omgang og at fleire spelarar då viser at det er godt potensiale i laget. Dagens bestemannspremie går til midtstoppar Warhel Suleman, som med stor fart, speleforståing og duellstyrke ruva i forsvaret.

Neste kamp er borte mot Os1 onsdag 22.april.

Kampfakta frå Rosendal kunstgras

G19: Trio/Rosendal/Halsnøy-Bergen Nord 0-3 (0-1)

0-1 (30 minutt)

0-2 (85 minutt)

0-3 (92 minutt) straffe

Tilskodarar: Ca 25

Dommar: Kjetil Næs

Gult kort: Olav Kvandal Myklebust, TRH

Trio/Rosendal/Halsnøy sitt lag:

Olav Lernes, Torgeir Bøyum (Eirik Wangensten frå 86 minutt), Olav Kvandal Myklebust, Warhel Suleman, Daniel Øvstebø, Vemund L. Grønstøl (Dawit Kahsay frå 45 minutt), Simen Røssland (Torstein Myklebust frå 87 minutt), Dawit Kahsay (Kristoffer Eskeland frå 35 minutt), Emanuel Onasaka, Sondre Myklebust, Martin Veastad.