Fekk det tøft på Stord

Mathias gjorde ein strålande førsteomgang på stopparplass.

I starten var det vi som var nærast, men ein kanonade med litt for slappe avslutningar i Stordfeltet gav ikkje utteljing. Ei heller eit par gode sjansar på corner, ikkje minst då Espen dukka opp på bakerste etter nok ein god serve frå Vegard. I staden kom Stord på ein rask overgang og sette inn 1-0. Rett etter vart det også 2-0 på corner, noko vi sleit veldig med. Stordingane var gode på daudballar og lagde veldig stor bevegelse i feltet, noko vi ikkje var menn om å demme opp.

To flotte mål av supersub Tarmo.

Men i spelet hang vi elles bra med, og 25 minutt ut i omgangen kom supersub Tarmo innpå. Han brukte berre 5 minutt på å bringe oss a jour. Først på frispark. For ein keeper å stå langt ute når Tarmo ladar kanonen, er sjeldan lurt. Sjølv ikkje når frisparket er 30 meter frå mål. Kanonskotet suste inn i langhjørnet og reduseringa var eit faktum. Og då var vi verkeleg på hugget. Ikkje lenge etter kom også utlikninga, då Tarmo vart spelt fri på venstresida,sprang i frå backen og knalla ballen via keeper og i mål. Vi trykka godt på dei siste minutta før pause også, men trass i eit godt skot frå Sander, måtte vi nøye oss med 2-2 midtvegs.

Benjamin var veldig frisk før pause.

Topp stemning i pausen og vi var veldig nøgde med måten vi hadde bretta opp ermene og kjempa oss inn i kampen. Dette måtte vi prøve å gjenskape. Istaden vart daudballane eit mareritt for oss. På omgangens fem første minutt hadde Stord scora to nye cornermål. Her er vi for snille, uoppmerksame og viljelause. Det tok litt av motet frå oss og gløden var ikkje heilt den same som i første. Nokolunde jamnt i spel likevel, men Stord la på til 5-2 midt i omgangen, og dei siste ti minutta var det slutt på kreftene for ein del av våre spelarar. Av ymse grunnar kunne vi ikkje bytte, og Stord utnytta håla som kom til syne til 3 nye scoringar.

Sander viste god moral og kjempa godt.

Dermed vart resultatet uhumske 8-2 til heimelaget. Så gale hadde det ikkje trengt å vera, men vi får ta med oss ein god prestasjon før pause. Ekstra ros til Benjamin og Mathias for veldig godt spel i første omgang, og til Sander som verkeleg gjekk føre då det trengtest som mest i andre.

' 

Komande veke er det bortekamp mot Trott på søndag for Trio 2, medan Trio 1 tek i mot Solid til dyst på Kvednabekkjen på tysdag.

Kampfakta frå Langeland kunstgras

G14: Stord2-Trio1 8-2 (2-2)

1-0  (15 minutt)

2-0 (19 minutt)

2-1 (27 minutt) Tarmo Tars

2-2 (31 minutt) Tarmo Tars

3-2 (37 minutt)

4-2 (40 minutt)

5-2 (50 minutt)

6-2 (60 minutt)

7-2 (64 minutt)

8-2 (66 minutt)

Trio sitt lag:
Vegar Teigen, Jonas Teigen, Mathias Gjelseng, Espen Aakre Sjo, Robin Steinsletten, Gaute Thorkildsen, Simen Hellevik Lie, Benjamin Skarveland, Sander Dolonen Brækken, Daniel Sørtveit, Vegard Fausk.

Innbyttarar: Anders Solheim Dyrhaug og Tarmo Tars.

- Trenar Are Ulseth