Grei siger mot Fitjar

Vi mønstra nesten like mange 13-åringar som 14-åringar i dag og det gjev oss litt meir offensiv slagkraft. Det gav oss også heile 5 innbyttarar og sjølv om mødrene synest det er beste med mange innbyttarar, er det eit strev å forhalde seg til som trenar. - Kan eg få innpå nooooo? :)

Fitjar framsto som eit veldig velspelande lag med mange kvikke, tekniske gutar som kombinerte fint i lag. Dei hadde hakket meir driv i banespelet enn vi hadde, men dei mangla litt framme i banen, der dei ofte vart litt ivrige og upresise. Det skal vi nok vera glade for, men med det skaffa vi oss også relativt god kontroll bakover. Keeper Tormod heldt i allefall roen, men det hadde han nok gjort sjølv om Dovrefjell hadde falle også :)

Tre målgjevande av Sander.

Vi derimot, var rett så kvasse framover. Vi mønstra nokre skikkelege måltjuvar i front og dei svikta ikkje. Sander var involvert i det meste vi skapte offensivt, der vi gjerne brukte venstresida i overkant mykje. Kvarteret ut i omgangen scora vi to kjappe etter forarbeid frå dampen frå Finnmark. Først var Martin på rett plass til rett tid og knappe femminuttet etter var det Lars som avslutta eit strålande angrep, der Sander sitt innlegg vart spelt innatt av Mads på bakre stolpe. Lars kunne rett etter også ha auka då han kom åleine gjennom etter at Espen vann ein hovudduell. Men flott parade av keeper og det sto 2-0 midtvegs.

Det var vi godt nøgde med og vi terpa stort sett på det same som før start. Vi kunne vera litt tøffare i duellane og kome meir opp i motstandaren, før dei fekk kontroll og kunne drible. Målsniken Lars gjekk ut, men inn kom ein anna målsnik. Daniel trengte berre vel minuttet på å sette inn 3-0. Jonas spelte inn frå venstre, Sander flikka og Daniel drog ballen over på venstrefoten, før han viste at han er 14-årskullets klårt beste avsluttar. Lekkert!

Banens beste: Joakim.

Sidan gjekk kampen føre seg relativt sjansefattig. Det vart mykje bytter og rokeringar på oss, men sjølv med 16 mann på blokka, må alle få sin porsjon speletid. Tidvis var vi litt stressa bakover siste kvarteret, men også her vart Fitjarbuen litt for upresise og Tormod kunne notere årets første clean sheet. Han var stødig i dag, men bestemannspremien går til Joakim, som var solid både som back og stoppar. Uansett ein godt gjennomført kamp av alle.

I morgon ventar ei beintøff oppgåve for Trio 1, som får besøk av den suverene serieleiar Odda.

Kampfakta frå Kvednabekkjen

G14: Trio 2-Fitjar 3-0 (2-0)

1-0 (13 minutt) Martin H. Arnesen

2-0 (17 minutt) Lars Olderkjær Larsen

3-0 (37 minutt) Daniel Sørtveit

Tilskodarar: Ca 25 standhaftige i eit forferdeleg regnver

Dommartrio: Nikolai Mayer, Vebjørn Røssland, Marcus Størksen

Ingen kort.

Trio sitt lag:

Tormod Sund Vårdal, Joakim Heimvik, Ole Martin Byrknes (Edvin Vågen Bjørgvik frå 50 minutt), Tarmo Tars, Torstein Olderkjær (Jonas Teigen frå 35 minutt), Mads Jørgensen (Magnus Vik frå 50 minutt), Marcus Nilsen Mathisen, Espen Aakre Sjo (Simen Hellevik Lie frå 35 minutt), Sander Dolonen Brækken, Lars Olderkjær Larsen (Daniel Sørtveit frå 35 minutt), Martin Hjelmeland Arnesen.

Samt nokre småbytter på tampen.

- Trenar Are Ulseth