Revansje i Trioduellen

J13: Trio1-Trio2 2-4. Det vart duka for årets andre lokaloppgjør mellom desse laga. Forrige kamp vann Trio 1 med eit mål. Denne gongen var det revansjesugne Trio 2-jenter som ville mest i regnveret på Valen.

Stad: Valeparken
Dommar: Dion Clifton Attille, dømte sin første kamp. Det gjekk bra det!

Mål Trio 2: Celina 2, Sofie og Hedda
Mål Trio 1: Ida og Frida

Etter ein jamn halvspelt første omgang scora Sofie det første målet. Endelig løsna det for Trio 2! Etter nokre minuttar dukka Celina opp med gullfoten, og knalla ballen i mål. Herlig scoring! Malin Saug gjer ein særs god kamp i forsvar og stoppar/uroar Trio 1-jentene så dei ikkje får kome gjennom på topp. Hedda har flotte pasningar, og Sofie løfter blikket og er meir orientert mot å spele i lag med laget. Jenny spelar årets kamp på midtbanen. Giftige Jenny er i slag i dag og er overalt.

Trio 2 har veldig mange sjansar på mål, først Frida, så Emily og så Frida att; der kom reduseringa, 1-2. Trio 2 finn kvarandre på banen, spelar godt, og Frøya legg opp til gode pasningar på venstresida. Det fører til gjennombrotspasningar, og Hedda tek Trio 2 opp i leiinga til pause, 1-3!

Kvar og ein spelar får med seg kvar sitt råd om kva dei må arbeide med i andre omgang. Det er ein veldig kjekk og jamn omgang, men Trio 2 er mest frampå og vert belønna med å gå opp i leiinga 1-4.

Kaja har gjennom heile kampen mange gode redningar for Trio 1, og det er kjekt å sjå korleis dette løfter sjølvtilliten hennar utover i kampen, og tek ansvar som ein del av forsvaret.

På slutten av kampen pressar Trio 1 på Trio 2, men Sara viser seg og fram i Trio 2 målet. Ida blir meir og meir frustrert, men til slutt klarer ho å ta ein retur i frå Sara og skyt ballen i mål, 2-4. Like før slutt har Frida ein kjempesjanse framføre målet, men skotet går utanfor. Skit og padda!

Resultatet står seg og ein velfortjent seier til Trio 2! Kjekt å sjå korleis dei framstår samla som eit lag!

Heia Trio!

- Siri Rusten


	Tilbake