Onsdags-Gjengen

Det viktigaste først. Samlingane startar med kaffi og noko attåt på Trioloftet, og praten går livleg om både gamle og nye tider. Etterpå er det tid for å gjere ein innsats. Nokre har dårleg tid eller helse og går heim, men mange bretter opp ermene og går laus på ymse dugnadsoppgåver. Svein Røyrvik har vore primus motor for å få i gang Onsdags-Gjengen.

Kåre Nissestad og Birger 'Biggen' Grønstøl i arbeid med dørkskinnene til dei nye innbytarbenkene.

Det er mange forefallande oppgåver som blir teke tak i, både innomhus og ute. I vinter har dei mellom anna mala veggane, dører og vindauger i storsalen på Triohuset. Dette arbeidet pågår enno.

Nokre gonger er det ikkje ver til å gjere noko som helst. I årsmeldinga som vart lagt fram på årsmøtet, er aktivitetane gjennom året lista opp. Nokre veker i november såg det slik ut:

- Litt dårleg ver. Gjorde ingenting

- Veldig dårleg ver. Gjorde ingenting.

- Forferdeleg dårleg ver. Gjorde ingenting.

' 

Men elles er dette ein aktiv gjeng, som gjer ein uvurderleg innsats for idrettslaget. Og for kommunen faktisk, sidan mykje utbetringar vert gjort på det kommunale anlegget Husnes stadion. I desse dagar har det vore arbeidd mykje med nye innbyttarbuer tilknytta grasbanen. Desse blir innfesta i muren rundt løpebanen.