Kjekk dommarsamling

13 av dommarane våre møtte til dommarsamling på Triohuset onsdag kveld. Oddvar og Are organiserte eit lite tematreff på tampen av vårsesongen. Først var det råd å sjå G16-kamp, for dei som ikkje spelte. Så var det ei teoriøkt på Triohuset, før vi avslutta med å sjå EM-kamp i lag på storskjerm.

Vi gjekk gjennom status for dommarane, som tok rekrutterings-dommarkurset for halvanna år sidan. Nokre dømmer aktivt, nokre tek kun oppdrag på førespurnad. Nokre har dømt mykje, nokre berre ei handfull 11arkampar. Vi prøvar å legge til rette så flest mogleg får dømt ein del, og prøvar etter beste evne å følge opp dommarane i einskildkampar.

Positivt at dei færraste har gjort seg særskildt negative opplevingar i dommargjerninga. Det er som regel ein god tone på kampar i Kvinnherad. Nokon gonger vil det også bli hardare tak, og det er læring i å kome ut for slikt også. Alt i alt er det å vera fotballdommar noko som er utviklande.

Vi såg på ein del videoklipp som viste situasjonar med både hands og taklingar og vi hadde ein god diskusjon rundt kva situasjonar ein må slå ned på for å beskytte spelarar og kva ein skal sjå etter for å vurdere situasjonar med mogleg kort av begge farger.

Frankrike og Albania bydde på ein heller keimsam affære i etterkant, tamt både i spel og med tanke på kontroversielle dommaravgjerder. Ein stor takk til Anita Vågen, som hjalp til og steikte pizza for oss medan vi analyserte intrikate dommarsituasjonar.

- AreU


	Tilbake