Kvednabekkjen ferdig til 17. mai?

Fredag vart innspurtsplanen for bygging av Kvednabekkjen kunstgrasbane lagd. Går alt som vi trur, vil banedekket vera klart til bruk før 17. mai. Men, det krev brukande temperatur og opphaldsver.

Det skal byggjast ny tribune mot grusbanen. Tribunen skal byggjast i tre og vera tett, slik som vist på bilete.

Natursteinmuren og den støypte ringmuren er ferdig. Rett over påske startar utlegging av pukklaget. Deretter skal det leggjast 10 cm fin sand som underlag for kunstgraset.

Kunstgraset kjem til Husnes rett etter påske, men utlegging vil først ta til første veka i mai. Det er legging av kunstdekket og ifylling av fin sand oppi graset som er veravhengig. For å lima graset i skøytane må det minimum vera 8 plussgrader. Når den fine sanden skal jobbast ned i kunstgraset, må det vera opphaldsver, elles vil sanden klabba og vera uråd å leggja ut.

Utanom ferdigstilling av sjølve speleflata, skal det lagast ny tribune mellom natursteinmurane på sida mot grusbanen. Det skal og setjast opp gjerde på kortsida mot Røssland og på langsida mot Myrane barnehage. I tillegg skal det asfalterast ein del, mellom anna skal vegen ned på banen asfalterst. P-plassen ved Myrane Barnehage skal ferdigstillast ved å asfaltera inn til murane langs plassen.


	Tilbake