Hyllest til pensjonerte midtstopparar

Ronny var A-lagsspelar allereie i forrige årtusen og for dei som hugsar A-laget i sesongane 2001-02, så var han ein av dei fremste spelarane i 3.divisjon allereie då. På den tida veldig allsidig på banen, då han spelte både midtstoppar, back, ving og spiss. Så gjekk turen til Sogndal, der han spelte fleire sesongar for Fjøra i studietida. Han har også nokre prøvespel i Sandefjord og nokre sesongar i Stord på baken. Hausten 2005 var han attende i moderklubben Trio og fekk då også med seg toppsesongen 2007, som inneheldt avdelingssiger i 3.divisjon, opprykkskvalik, samt møte med Brann i cupen. Den gongen var han makker med Trond-Inge Haugland i eit særs solid Trioforsvar. Totalt endte han på 235 obligatoriske kampar for Trio, noko som gjev 10.plass på adelskalenderen.

Henrik er 4 år yngre enn Ronny, altså berre ungdomen med sine 32 år. Men når familien aukar på, er det andre ting som krev sitt. Så då faren pensjonerte seg frå Hydro Husnes, fann Henrik ut han skulle pensjonere seg som fotballspelar. Henrik har vore Triogut i heile si karriere og kom inn på A-laget i ein alder av 17-18 år. Totalt er det blitt 175 A-kampar, noko som er 20.plass på lista. Med den eine han fekk i år, så skulle han tangere dagens A-lagstrenar Aleksander Ekeland på adelskalenderen. Men Ekeland har sørga for å halde han bak seg ved å sikre seg sjølv nokre minutt i ein kamp i år også. Visstnok kom to spelarar for seint til denne bortekampen, så i mangel på spelarar, spelte Aleksander første ti minutta av kampen. Dette skjedde på Telavåg langt ute på Sotra, så det let seg vanskeleg verifisere. Men det er kjent at Aleks var skuld i eit baklengsmål på dei ti minutta før han kom seg av banen :)

Velvel, Henrik får heller krone seg med tittelen Trios mest hardtskytande. Ein gong det var skotkonkurranse med lasermåling på senteret, vart Henrik klokka inn på 113 km/t, hårfint framom Roger Røssland. Slegga har han også vist fram mang ein gong i kamp, både på frispark og etter raid fram frå høgrebacken, og sidan stopparplassen.

Trio ønskjer å takke også Henrik og Ronny for innsatsen gjennom mange år og dei får altså i lag med Roger utdelt kvar sin blomsterkvast under A-lagskampen laurdag. Møt fram og hyll gamlekarane ein siste gong!