Snudde med sterk andreomgang

Vi tok tak i kampen og pressa godt det første kvarteret. Berre 13 minutt ut i kampen fekk vi straffe. Vegard F hadde ein stor sjanse, og Hekmat vart felt då han skulle sette inn returen. Dermed blas kampens rutinerte og stødige dommar. Han har elles svigerforeldre frå Husnes, Peggy og Olaf Johnsen. Nordmøringar, til og med! I alle høve, Daniel sette straffen utanfor stolpen, og vi var like langt.

Etter kvart kjempa Os seg meir inn i kampen og det var relativt jamnspelt og sjansefattig. Etter knappe halvtimen gjekk heimelaget i føring, etter litt kommunikasjonssvikt. Viss keeper gjev klår beskjed i slike tilfeller, unngår vi slike baklengs. For vår del vart det ei noko rotete avslutning på omgangen. Daniel fekk gult for å skyte etter at dommaren hadde blese (5 minutt soning), Erik kom inn for Mathias som aoa foten, og nærare pause kom Sander inn for ein Jonas, som var blitt vel heit i toppen. Det tok litt tid å kome i gjenge igjen, og 1-0 sto seg til pause, etter at Omid og Alen hadde hatt eit par gode forsøk på tampen.

Ein banan og litt peptalk med tru på at vi skulle snu dette, såg ut til å hjelpe. For vi gjekk ut og tok skikkeleg tak i det i andre. Jonas kom inn att på midten og vi flytta Daniel ut på kant, samstundes som Omid kom fram på motsett kant. Det gav oss mykje tempo på sidene. Ei god ballvinning og fint gjennomspel frå Sander, gav Omid moglegheita. Han traff nettveggen, og det gjorde også Gaute rett etter.

Men ting var på gang. Bakover hadde Espen og Simen stålkontroll i midtforsvaret, med eitt unnatak. Då kom brått Os-spissen åleine gjennom og scora sikkert. 2-0 var ein kalddusj, men det gjorde berre godt i sommarveret. For vi køyrde på og det var utruleg at ballen ikkje gjekk i mål på Daniel sin dobbelsjanse. Så serverte han eit flott innlegg, som Omid hamra like utanfor på heil volley. Skulle dette vera one of those days?

Neida, vi pressa så hardt at belønninga måtte kome. Etter at Daniel gjorde alt forarbeidet og skar inn frå kant og la ut, drog Sander av ein mann og sette reduseringa sikkert i hjørnet. Og no gjekk det fort. Berre tre minutt seinare var vi a jour, då Gaute drog fram hovmeisterfoten og la eit framifrå gjennomspel på foten til Daniel. 2-2 og framleis over ti minutt att!

Vi ville ikkje gje oss med dette og satsa alt vi hadde framover. Robuste Alen hadde gjort ein god jobb som oppspelspunkt på topp, men no kom tida for enda meir tempo. Hekmat inn på topp, Daniel gjekk inn som hengande spiss og Mathias opp på kant. Her skulle eit slitent Os-lag verkeleg få tynt seg i sluttminutta. Og det vart eit stormløp mot Os-målet. Ny krempasning frå Gaute, men Daniel traff stolpen.

SÅ, endeleg! Vi avgjorde kampen på to minutt med to prikklike mål. Tormod spelte fri Mathias på høgrevingen, han skar inn og avslutta på keeper. Der var Hekmat på plass og banka inn returen. Og to minutt etter var det Mathias som sendte Sander gjennom på same høgrekant. Ny retur etter skot frå skrått hald, og denne gongen var det Omid som var frampå. 2-4 og full jubel.

Fortent siger og solid laginnsats. Trekkjer særleg fram Simen, som var stødigare enn nokon gong i midtforsvaret i lag med Espen. Og plussar til Omid for ein knallgod kamp både som back og ving. Då er det heimekamp neste helg når Moster kjem på besøk.

Etter kampen tok heile gjengen turen til Brann stadion og såg heimelaget nesten gruse Viking. Det einaste som øydela ein perfekt dag, var kampens siste ballberøring. Trur i grunn ikkje det var så veldig mange som fekk øydelagt humøret på vegen heim llikevel :) 

1-0 (25 minutt)

2-0 (53 minutt)

2-1 (63 minutt) Sander Dolonen Brækken

2-2 (67 minutt) Daniel Sørtveit

2-3 (73 minutt) Hekmatullah Ahmadi

2-4 (75 minutt) Omid Karimi

Gult kort: Daniel Sørtveit og Tormod Sund Vårdal.

Tormod Sund Vårdal (Aref Hossainizada frå 40 minutt), Omid Karimi, Simen Hellevik Lie, Espen Aakre Sjo, Mathias Gjelseng (Erik Thomas frå 25 minutt, Tormod frå 60 minutt), Gaute Thorkildsen, Jonas Teigen (Sander Dolonen Brækken frå 34 minutt), Daniel Sørtveit, Hekmatullah Ahmadi, Alen Foric (Hekmat frå 68 minutt), Vegard Fausk (Vegar Teigen frå 35 minutt, Vegard frå 73 minutt).