I tøffaste laget

Triojentene gjekk respektlaust til verket mot eit Oddalag som sto veldig høgt med forsvaret. Allereie før to minutt vart spelt, fekk Nadine ein ball i bakrommet. Ho storma åleine mot mål, heldt forsvararen unna og styrte ballen kontrollert i hjørnet. 1-0 og ei pangopning.

Men det tok ikkje lenge før Odda var a jour. Ein corner gjekk gjennom heile feltet og på bakre stolpe var det ei Oddajente som netta sikkert. Nokre minutt seinare kom også 1-2 då Triokeeperen feilrekna eit langskot. Kort etter varta Emma W opp med ei dobbeltredning etter frispark. Og få minutt etter der igjen hadde Odda eit stolpetreff. Trio var ute å køyre i denne perioden. Odda sendte mange folk framover og klarte fleire gonger å vera i overtal mot Trioforsvaret og framføre mål. Triojentene vart litt for passive og sleit med å demme opp. 1-3 kom på ein retur midt i omgangen.

Men Odda sto som nemnt veldig høgt med forsvaret, og det er vågalt mot gode og raske spissar som Nadine og Julie. Det kunne straffa seg då Emma H førte opp langs venstresida og serverte Nadine ein ball bak Oddaforsvaret. Men skotet gjekk like utanfor. Etter å ha vore pressa i første halvdel av omgangen, kom Trio meir inn i spelet mot slutten og 1-3 sto seg til pause.

Trio hadde ikkje gjeve seg. Tidleg i andre omgang fekk Julie sjansen, etter fint Ex-Ternen-samspel med Emilie. Målmaskina frå J13 netta sikkert og det sto 2-3.

Men etter kvart var det Odda som tok over og dei spelte seg til fleire store sjansar. Hadde det ikkje vore for Emma H, som overtok keeperhanskane i pause, så hadde det blitt stygge sifre. Men ho storspelte i buret og varta opp med den eine kjemperedninga etter den andre. Men midt i omgangen måtte ho til slutt kapitulere etter sterkt Oddapress, og noko seinare vart sluttresultatet fastsett til 2-5.

Likevel ein god prestasjon av Triojentene, som no tek i mot Voss til ny heimekamp på laurdag.

1-0 (2 minutt) Nadine Morstad Attille

1-1 (5 minutt)

1-2 (10 minutt)

1-3 (19 minutt)

2-3 (40 minutt) Julie Soma Ersland

2-4 (52 minutt)

2-5 (57 minutt)

Dommar: Espen Aakre Sjo

Trio sitt lag:

Emma Weberg Kaldestad, Mia Ingvaldsen Høydal, Andrine Ynnesdal, Helene Vågen Eikenes, Emilie Askeland, Luwam Kahsay, Nadine Morstad Attille, Emma Miranda Grindheim Heggøy, Julie Soma Ersland, Astrid Borgen, Ariana Quam.