Løysna etter pause

Vi kjenner Moster som eit litt ujamnt lag med nokre sterke og skotsterke karar sentralt. På 9arbane var difor målet å unngå unødvendige frispark frå midtbanen og inn mot eige mål, då dei sist gong gav oss mange farlege skot på slike sjansar. Men målet var å bestemme kampen, få fart på ballen og kome rundt på kant. 

Det tok ikkje lenge før vi gjorde det, faktisk allereie i første speleminutt. Det endte med eit godt skot frå Espen, som gav oss corner. Den skrudde Gaute rett i mål. Litt uheldig keeperinngripen, men uansett ein pangstart frå oss. Vi heldt koken og fekk ein 2-3 sjansar til targetspiss Marcus. Men på ei kontring kom plutseleg Moster a jour. Ein av få gongar vi var i ulage defensivt i kampen, for bakover gjorde vi ein veldig solid innsats i dag.

Men framover skurra det stadig meir. Vi kava for mykje og slo dårlege pasningar. Slurva og brukte tå eller utside der ei enkel innsidepasning hadde gjort susen. Vi prøvde på kombinasjonar og dei få gongane vi var presise nok, kom vi til sjansar. Men for ofte vart det upresist og slurvete. Espen ønskte seg straffe då han vart skubba i skotaugneblinken, men dommaren sa nei og vi gjekk til pause med 1-1. 

Pausepraten gjekk på å vera meir presise og gjere kvarandre gode. Vi kjenner medspelarane og veit kor raske dei er og kor dei vil ha ballen. Meir tydelege og nøyaktige, så skulle vi ut og vise at vi var betre enn motstandaren. 

Og det klarte vi særs bra. Vi tok tak i det frå start og fekk pasningsspelet til å sitje betre. Allereie i første minutt varta vi opp med eit kjempeangrep, som viste at vi meinte alvor. Espen fekk ballen på venstra då han skulle avslutte, så skotet gjekk over. Men vi var i gang! Fine kombinasjonar vidare og det var eit tidsspørsmål før det skulle løysne. Og det gjorde det då Simen spelte opp Jonas på høgresida. Han avslutta på keeper, men returen sette Marcus sikkert i mål. 1-2 og vi såg oss aldri tilbake.

1-3 kom ikkje lenge etter og då var det keeper Tormod som noterte seg for assist. Eit raskt og langt utspark då Moster var i ubalanse. Backen feilrekna og Jonas kom igjennom. Keeper gjekk ut og pressa han ut mot sida, men på eitt tidspunkt fann målvakt ut at no måtte han heim til målstengene sine igjen. Det såg Jonas, vendte opp og chippa lekkert inn 1-3 med sin presise høgrefot. Vakkert!

Edvin var på hugget i dag og storspelte nok ein gong i forsvar. Han har fått mykje skryt i det siste, så også i dag. Han blir stadig tryggare i midtstopparrolla og velger gode løysingar med ballen. I dag var han også målfarleg. Eit hardt frispark gav 1-4, rett nok med hjelp av ei styring frå ein Mosterfosvarar. Og 10 minutt seinare lukkast vår storvokste stoppar endeleg også på corner, då han stanga inn 1-6 på Vegard sin presise serve. Edvin Vågen Bjørgvik, folkens. Man of the match. 

I mellom der hadde Samson hamra 1-5 i hjørnet frå 20 meter. Moster var i ferd med å gje opp, og det hjalp ikkje med at dei fekk eit gulkort og fem minutts soning. Marcus knalla inn 1-7 på halv volley og på slutten fastsette Vegard resultatet til 1-8, då keeper ikkje klarte å klarere innlegget.

Dermed storsiger, noko større enn den hadde trengt å vera då Moster resignerte utover i andreomgangen. Men ein veldig godt gjennomført omgang av oss og tidvis kanskje noko av det beste angrepsspelet vi har levert i år. Kjekt å sjå gutane ha trua og sleppe seg laus. 

Då er det slutt på seriekampane for i vår, men vi trenar ufortrødent heile sommaren, for vi skal på Norway Cup! :)

0-1 (2 minutt) Gaute Thorkildsen

1-1 (9 minutt)

1-2 (47 minutt) Marcus Nilsen Mathisen

1-3 (52 minutt) Jonas Teigen

1-4 (58 minutt) Edvin Vågen Bjørgvik

1-5 (61 minutt) Samson Nyrud Uppheim

1-6 (66 minutt) Edvin Vågen Bjørgvik

1-7 (70 minutt) Marcus Nilsen Mathisen

1-8 (77 minutt) Vegard Fausk

Gult kort: Eitt til Moster.

Tormod Sund Vårdal, Jonas Teigen, Simen Hellevik Lie, Edvin Vågen Bjørgvik, Vegard Fausk, Espen Aakre Sjo, Samson Nyrud Uppheim, Gaute Thorkildsen, Marcus Nilsen Mathisen, Vegar Teigen.