Oppsummering Trio 2 i Norway Cup

På papiret var laga våre jamne, med Trio 2 som det laget vi rekna å ha størst maxpotensiale, særleg offensivt. Og då midtstopparane framsto som tryggare og meir solide enn aldri før, kunne vi flytte Tarmo opp på topp og få meir pondus der. I tillegg spelte dei mest usikre korta på laget heilt opp mot sitt beste og sørga for både tempo framover og imponerande defensiv jobbing. Då skal vi vera strålande nøgd med cupdeltakinga.

Som venta vart sterke Besa frå Makedonia eit nummer for store i første kamp. Utanom to cornermål i mot, gjorde vi ein rimeleg sterk kamp defensivt. Skapte også ein del på kontringar mot eit lag som fylte veldig på framover, men hadde ikkje marginane med oss. Mot slutten kosta eit tullete gulkort oss to baklengs då vi var 6 mot 7, slik at det totalt sett endte 1-6 og heller ordinært. Tarmo reduserte med eit flott volleyskot.

I kamp to starta vi bra, men midt i første omgang vart føresetnadane snudd på hovudet. Vår stødige keeper Aref redda, men fekk ein kakk og ein stygg kommentar frå motstandarspissen, noko som gjorde at vår mann snudde seg og sparka til han på leggen. Slikt gjev raudt kort, ingen tvil om det. For Aref betydde det kraftig reduksjon i speletid i turneringa, for då måtte han også stå over neste kamp. Og sidan reservekeeper Vegar storspelte, vart han også omgjort til keeper i staden for utespelar også i sluttspelet, noko som gjorde at målvaktene delte speletida.

I kampen betydde det også at vi var 6 mot 7 i 75 % av kampen. Det skal ikkje kunne gå bra, men vi samla oss og var innstilte på å jobbe knallhardt. Resten av førsteomgangen viste vi at vi med enorm innsats av alle klarte å kjempe jamnt med sunnmøringane frå Blindheim. Tonen i pausen var at dette kunne vi klare. Fantastisk å sjå beinhard jobbing frå driblefantane Daniel og Mathias, samt at Yonas og Mohammad framsto like pliktoppfyllande. Sjølv då Blindheim kontra inn 0-1 etter ti minutt, hadde vi trua. Dette skulle vi snu!

Simen og Edvin var knallgode i forsvar, og særleg Simen måtte ta stort ansvar då vi spelte utan kant på hans side. Men Blindheim kunne truleg sendt 8-10 mann fram på den sida utan at dei hadde klart å overmanne Simen, som spelte sitt livs kamp. Og han byrja til og med å bidra framover, for han hadde assist då Daniel kom gjennom og utlikna. Ein enorm boost for laget og vi var ikkje i tvil. Vi var ikkje nøgde med dette, vi skulle vinne! Framleis 6 mot 7. Og to minutt før full tid lukkast vi også då eit langt kast frå Edvin sendte Tarmo åleine gjennom. 2-1, ein fantastisk prestasjon!

Før siste gruppekamp mot eit Falkeid-lag som hadde like mange poeng som oss, men betydeleg betre målskilnad, var underteikna ikkje i tvil. Dette kom vi til å vinne. Og gutane gjekk ut på ein lekker kunstgrasbane og spelte den beste fotballen vi nokon gong har sett av dei. Etter eit tidleg stolpetreff, klarte Falkeid knapt å skape noko, medan vi sprang dei opp, spelte dei ut og sprudla dei fullstendig i seink. 4-1 vann vi etter nydelege scoringar av Daniel (2), Tarmo og Sander. Haugevis av flotte angrep med lekkert kombinasjonsspel og oppofrande defensiv jobbing og bombesikre bak. Reservekeeper Vegar hadde full kontroll frå A til Å. Herleg.

Falkeid var eit godt lag og viste ein winning streak i B-sluttspelet (10-0, 12-2 og 4-0 fram til semifinale) som vi kanskje kunne misunt dei, men plass i A-sluttspel slår alltid B. Som trenar er underteikna særs stolt over måten gutane tok seg dit på. At vi i første kamp møtte finalist Førde (som i spel også var mykje betre enn vinnar Hareid) og hadde små sjansar til å stå i mot dei, skal vi tåle. 0-5 mot cupens beste lag, det skal vi leve med. Ekstra skryt til midtbanegeneral Sander i denne kampen, for hardnakka kjemping til det siste sjølv om det butta i mot.

Alt i alt ei imponerande gjennomført turnering av alle på Trio 2. Kjekt å sjå at alle sto fram og løfta nivået. Særleg stas med Simen og Edvin som er blitt fleire mil tryggare bak, men også med det flotte angrepsspelet vi fekk til i fleire av kampane.