Ternen J11 vann Fair Play-prisen

Det er alltid vanskeleg å skilje mellom laga, for det er som regel veldig få negative tilbakemeldingar. Vi vurderer blant dei som leverer inn fair play-vurderinga, og ser etter kva tilbakemeldingar dei har fått i frå motstandarar, dommarar, sekretariat og turneringsleiinga. Oppførsel i cupteltet blir også etter beste evne teke med i vurderinga.

Vi set også pris på å ha fått veldig mykje skryt for dommarane våre. Og den skryten er gjensidig, aldri før har vi fått så mange positive tilbakemeldingar frå dommarane om laga dei har leia i kamp.

I år var det altså veldig mange kandidatar. Fleire har utmerka seg med god oppførsel, positive haldningar og opptreden på banen i Fair Play-ånd av beste merke. Vi har særleg lagt vekt på dommarane sine tilbakemeldingar, og her utmerka J11-klassen seg med å ha 100 %positivt (smileys) i alle kampane. Vinnaren måtte difor kome frå denne klassen, men å peike ut eitt, var ikkje lett. Ei heilskapeleg vurdering der tilbakemeldingane frå motstandarar og vakter gjorde at det sto mellom 2-3 lag. Og vi har til slutt klart å plukke ut eitt.

Årets fair play-pris er sponsa av Sumarum Regnskapsbyrå, og er billettar til ein Brann-kamp eller FKH-kamp. Vinnaren er Ternen J11.

Vedavåg best i opptoget

Som vanleg gjorde alle laga opptoget vårt til stor stas. Mange deltok aktivt og lagde mykje leven og mange hadde kledd seg ut. Det var mange gode kandidatar. Kjekt å sjå at nokre av dei som gjekk bak i toget til og med hadde eigen musikk, og mange gaula for full hals på laget sine kamprop. Eller som Trott og Fitjar: Dei heia på kvarandre :)

Vi fall særleg for eitt lag, som hadde lagt stor flid i å kle seg ut, hadde flotte parykkar og song og lagde veldig mykje lyd. Premien for beste innsats i opptoget er gavekort på Peppes Pizza på 2000 kr, sponsa av Bygger'n Teigen!