Tøff motstand for G16-2

Motstandar på Djervbanen i første kamp var Bryne 2, som spelar i 1.divisjon i Rogaland. Dei var eit solid, klokt og velspelande lag. Vi spelar i periodar bra og skapar ein del, utan å få utteljing. Bryne scorar eitt i kvar omgang og vinn fortent 2-0. Dei var eit lite hakk betre enn oss, ikkje minst var dei betre organisert. Det seier litt om nivået på G16-laga i cupen når dette laget som hevdar seg i 1.divisjon i Rogaland, måtte ta til takke med B-sluttspel!

For dei to neste laga vi møtte i gruppespelet var dei to laga som skulle ende opp i A-finale. Norheimsund var eit jamnt besett lag med nokre veldig raske spelarar offensivt. Vi gjorde ein god første omgang, 0-1 midtvegs etter jamnt i spel. Men ein heller svak andre gav sluttresultat 0-5. Å byte 5 spelarar i pausen, slik vi gjorde i alle kampane, gjer at det er vanskeleg å halde strukturen i laget. Men er vi 16 mann på cup, så er vi det.

Siste kampen var mot Haugar, som faktisk vart puljevinnar. Det var det laget som virka mest overkommeleg. Etter ein tidleg baklengs på langskot der keeper fekk sola i augene, køyrde vi førsteomgangen og hadde bra trykk mot Haugar. Men det ville seg ikkje framom mål. I staden starta vi andre omgang med ein fæl forsvarsglipp og då datt vi fullstendig i hop. 0-6 til slutt, huff!

Dermed B-sluttspel, og der vart Bogafjell for sterke tidleg søndag morgon. Det endte 0-3 etter ein heller svak kamp av oss. Vi møtte eit fysisk sterkt lag og litt for få av oss klarte å manne seg nok opp. Men kjekt at Samson gjorde det meir enn vi er vant med, han var vår bestemann i den kampen.

Ergo tidleg heimreise, men ei kjekk helg med snille gutar. Takk til alle som bidrog med transport att og fram. No ventar seriekamp heime mot Moster på laurdag. Ingen grunn til å ta lett på den heller. Sjølv om Moster ligg sist på tabellen, har dei scora mykje mål i haust.