To kampar på eitt døgn

Mot damelaget skulle vi føre kampen og ha ballen mykje i laget. Det klarte vi greit, men heller ikkje meir. Vi har mykje å gå på når det gjeld presisjon og å legge sjela i pasningane. Sander scora to gonger før pause, begge etter assist frå Samson. Det første etter frispark, det andre som avslutning av eit flott angrep.

I andre omgang kom det fleire mål, men samstundes vart vi også meir frista til å gjere ting på eiga hand. Daniel sitt dribleraid var flott, men ikkje den type spel vi ønskte å sjå i denne kampen. Tarmo fekk ein liten omgang som spiss og var sist på to flotte scoringar etter strålande angrepsspel. Said fastsette sluttresultatat til 7-0 då han kom rundt på kant og skaut sjølv frå skrå vinkel i staden for å finne medspelar framom mål, slik han burde. Alt i alt ein ok kamp av oss, men som nemnt, mykje kunne vore betre.

Laget (mål i parentes): Aref - Ole Martin, Edvin, Tarmo (2), Yaser - Sander (2), Espen, Samson - Mathias, Jonas (1), Erik - Vegar, Said (1), Simen, Daniel (1).

Onsdag rett etter skuletid var det så tøffare motstand når juniorlaget (junior 1) var motstandar. Herleg at ein småsjuk Lars Røyrvik gjorde come back med dommarfløyta! Ni år sidan sist, kom han fram til. Men elles vart inngangen til kampen ganske rotete. Vi mønstra sjølv berre 12 mann, men G19 var enda verre stilt og lånte ein frå oss, samt at trenarane Bjarte og Christian spelte ein omgang kvar. I andre omgang bidrog vi med ein god del vas sjølv også, og leverte ein prestasjon vi ikkje kan vera bekjent av. Skal vi halde på slik, blir det stygge sifre i årets serie.

Men førsteomgangen var mykje betre. Her leverte vi solid og var relativt godt organisert. Ein susar i krysset frå Torstein, samt at A-laget sitt hurtigtog Nikolai tok fram toppfarten og gjorde stillinga 0-2 midtvegs, skal vi ikkje skjemst over. Men at det sto 2-8 til slutt, er ikkje bra. Då hang vi ikkje saman utan ball og gjorde mange skrøpelege prestasjonar på gode overgangsmoglegheiter. Fine trøystemål av Mathias og målmaskina Espen, det får vi ta med oss. 

Laget: Torstein - Simen, Espen (1), Edvin, Yaser - Sander, Ole Martin, Samson - Daniel, Jonas, Mathias (1). Samt Mohammad (1), utlånt til G19.

Ny kamp om ei veke, borte mot Solid.