Grei start

Trass i forventningane om at dette kunne bli ein veldig tøff kamp, valde vi å fleske til med ny formasjon. Det meistra gutane bra. Fokus var mest på duellar og å unngå 'juniorfeil' (hehe) i vår første juniorkamp. Vi har i treningskampane vore noko naive og servert motstandar mål med heilt banale feil, det skulle vi unngå i dag.

Og der var responsen veldig god. Ølen fekk føre spelet og vi la oss lågt frå start, men gutane viste fin aggresivitet og var tidleg oppe i press. Det var sjeldan Ølen kom til gode moglegheiter. Sjølv fekk vi ein god ein då Benjamin vann ballen, gjekk av ein mann og skaut i hjørnet. Keeper redda etter å ha vore i full strekk, men Benjamin meinte sjølv av det var eit dårleg treff. Altså har han meir på lager. Veldig kjekt å ha Sandvollbuen med på laget igjen, etter halvanna års pause.

Kort etter fekk Ølen eit kort for å hindre ei kontring og så klarte Samson nesten å treffe Benny i bakrom. Jau, vi var godt i gang. Aref varta opp med ei framifrå redning då Ølen kom til skot og i dag gav han heller ingen returar. Først halvtimen ut i kampen kom Ølen til ein stor sjanse, men då vart det også mål. Ein angripar fekk litt for lett drible seg forbi eit par mann. Kort før pause kom også 0-2, på ganske likt vis. Litt for snilt av oss, men det var unntakssituasjonane. For resten av omgang var veldig solid av gutane våre, og det fekk dei ros for i pausen.

Også første halvpart av andre omgang var bra defensivt. Ølen med eit visst spelemessig overtak, men vi heldt godt stand, og det vart sjeldan farleg. 20 minutt før slutt reduserte vi til 1-2 på vakkert vis. Fine kombinasjonar mellom Sander og Daniel, før sistnemnte kom til dødlinja og serverte førstnemnte for ein tap-in. Lett når ein kan det :)

Diverre hoppa ikkje Adam paradis lenge, det tok berre eit par minutt før Ølen fekk 1-3 på eit skot via ein forsvarar. Surt, for no augna vi sjansen. Men med det gjekk piffen litt ut av oss og dei neste 10 minutta var svake. 1-4 kom etter flott angrepsspel, medan ein midtstopparglipp gav 1-5. Skit au, vi heva oss siste ti minutta og fekk ei herleg redusering. Det er vanskeleg å setje Daniel inn i eit system og noko fridom må han få lov til å ha. Då gjer han også ting som vi andre berre kan drøyme om å sjå på TV. Han dansa seg forbi både 2 og 3 mann i feltet og avslutta sjølvsagt med å hæle ballen i tomt bur frå kort hald. Berre fordi det er kult :)

Velvel, 2-5 og ein grei seriestart mot eit velspelande og godt organisert Ølenlag. Som sagt med mange frå sist førstelagskamp, og to av spelarane skal også ut i A-kamp i morgon. Som reint 17-årslag skal vi vera nøgde med denne kampen, som gjev oss tru på at vi kan bite godt frå oss utover i sesongen. Også neste kamp blir heime om 2 veker, sidan Djerv 1919 har trekt sitt lag frå serien.

0-1 (28 minutt) 

0-2 (43 minutt)

1-2 (59 minutt) Sander Dolonen Brækken

1-3 (71 minutt) 

1-4 (77 minutt) 

1-5 (81 minutt) 

2-5 (84 minutt) Daniel Sørtveit

Tilskodarar: Nær 25

Dommar: Espen Moe, Odda

Gult kort: Espen Aakre Sjo og Samson Nyrud Uppheim, samt eitt til Ølen

Trio sitt lag: 

Aref Hosseinizada, Edvin Vågen Bjørgvik, Tarmo Tars, Simen Hellevik Lie, Mathias Gjelseng, Espen Aakre Sjo, Samson Nyrud Uppheim, Ole Martin Byrknes, Daniel Sørtveit, Benjamin Skarveland, Sander Dolonen Brækken, Jonas Teigen, Said Mohammadi, Yaserullah Tarakhel.