Poengdeling i målorgie

Med ein som ikkje hadde fått med seg at det var kamp i det heile og ein annan som kom dassande inn i garderoben kvarteret for seint med ein pizza i nevane, så kan det hende vi kunne hatt ein betre inngang til kampen...

Likevel tok vi føringa frå start og det tok berre tre minutt før første målet kom. Ruben sette i gong ein overgang, ut til Mohammad på venstresida som la inn. Der venta ikkje akkurat luftas baron, men derimot Daniel, som nikka elegant 1-0 i nota. 20 minutt ut i omgangen fekk vi også 2-0. Banens suverent bestemann, Ruben vann att ballen høgt i banen og vi var brått 2 mot 1. Ruben forserte og skaut sjølv, knallhardt i hjørnet. 

Utover i omgangen kom Stord meir med og festa eit visst grep. Eit fantastisk angrep endte med praktfull heil volley i tverrliggjar og ned. Om lag som ein generell seksuell debut: Usikkert om den var inne, men den bør telle uansett. Dommaren var ikkje enig.

Ruben og Tarmo fekk ein stor sjanse to mot ein, og Daniel hadde eit frispark i tverrliggjaren, medan Stord hadde ei heading på utsida av stolpen. Men 2-1 til pause etter ein god start, der Stord fekk initiativet i siste halvdel. Det måtte vi snu på, og det klarte vi bra, sjølv om vi fekk ein dårleg start på andre omgang. Vi har snakka ein del om unødvendige støttepasningar. Når vi er pressa, brukar vi støtte, men det er dumt å spele oss låge utan grunn. Og litt for ofte setter vi keeper i ein vanskeleg situasjon, slik kom 2-2 tidleg i omgangen. 

Så hevar vi oss og har eit visst overtak. To gode sjansar for Ruben, ved eine høvet skulle han nok lagt ut i feltet. Og Tarmo skaut over som avslutning på eit veldig godt angrep. Til slutt fekk vi 3-2, då Mathias spelte gjennom Sander, som var kontant og rask i avslutninga. Men Stord svara ei stund etter, då vi var passive på ein corner.

Likevel såg det ut som vi skulle klare å vinne. Mathias hadde ein frekkas frå skrått hald då keeper var på bærtur, nesten. Og Sander kom åleine gjennom og vart akkurat nok hindra i skotaugneblinken. Men Ruben skulle ha mål. Han kom fri etter ei klarering bakfra og var nådelaus. 4-3.

Mathias kunne også punktert kampen då Tarmo sendte han fri på høgrevingen, men skotet klarte keeper å slå til corner. Og i staden utlikna Stord med kampens siste spark på ballen, ein susar frå 30 meter. Bitter måte å miste sigeren på, men uavgjort var nok alt i alt greit. Ein ikkje spesielt bra kamp av oss, tidvis upresist og for mykje opp i lufta, sjølv om innsatsen var upåklageleg.

1-0 (3 minutt) Daniel Sørtveit

2-0 (18 minutt) Ruben Saug

2-1 (29 minutt) 

2-2 (49 minutt) 

3-2 (66 minutt) Sander Dolonen Brækken

3-3 (74 minutt) 

4-3 (79 minutt) Ruben Saug

4-4 (91 minutt) 

Dommar: Svein Arild Kjærland, Trott

Gult kort: Samson Nyrud Uppheim.

Aref Hosseinizada, Simen Hellevik Lie (Mohammad frå 80 min), Edvin Vågen Bjørgvik, Vebjørn Røssland, Mohammad Barakzai (Mathias Gjelseng frå 30 min), Espen Aakre Sjo (Sander frå 40 min), Samson Nyrud Uppheim, Ole Martin Byrknes, Ruben Saug, Sander Dolonen Brækken (Tarmo Tars frå 30 min).