Meir enn vi fortente

Underteikna er ikkje særskildt oppteken av mål og resultat, og sjølv om gutane meinte at det var storstilte greier med bortesiger mot Valen, så klarte vi til slutt å bli enige om at vi kan betre enn det vi leverte i dag. 

Geir Øystein lova å spandere pizza på laget viss vi klarte å halde nullen i dag og gutane tok ansvar for økonomien til trenaren ved å sleppe inn mål allereie i opningsminuttet. Veldig passivt frå alle. Utanom Tristan da, som sendte Valen i føring, 1-0.

Så klarte vi å få eit visst overtak i kampen, men utan at vi viste fram det vi kan. Innsatsen var god og vi kom til nokre sjansar. Mohammed A i stolpen, Elias åleine mot keeper og Mikal med ein corner i tverrliggaren. Valen på si side fekk eit mål anullert for hands. Men det var først mot slutte av omgangen vi fekk utteljing. Abdi sette inn 1-1 på ein retur, men det var Mikal sitt mål. Han vann ballen høgt i banen, drog seg fri og skaut så godt at keeper måtte gje retur. 

Og rett før pause gjekk vi opp i 1-2 då Mohammed A dribla 3 mann og skaut frå midtbanen. Jauda, fin enkeltprestasjon, men det er ikkje slik vi ønskjer å spele fotball. Mange dårlege valg i forkant av scoringa og ikkje noko det er verdt å gje skryt for.

Andre omgang starta med kampens flottaste angrep. Oppspel til Vegar på topp, flott mottak og pasning ut på vingen til Mohammed A. Nydeleg innlegg og Mikal på heil volley på bakerste stolpe. Nydeleg, men like utanfor. Mikal og Vegar var blant våre beste i dag. Kjekt med ein så tålmodig venstreving som Mikal, som trufast held breidden, sjølv om han blir brukt altfor lite i spelet.

Resten av omgang vart ikkje mykje å skrive heim om. Valen kjempa godt og pressa oss bakover. Vi gjorde mykje bra defensivt arbeid med å blokkere og hindre avslutningar, men spelemessig var det ganske dårleg. Vi kan mykje betre enn det, men heldt likevel tett, mest grunna gode redningar av Gunnar og klassespel av banens suverent bestemann, vår midtstoppar Andre. 

Mot slutten var det i staden vi som scora. Brage sette inn ballen etter corner, og då hjalp det ikkje på resultatet at Valen sin Emil reduserte minuttet før slutt. Våre gutar kunne juble for ein heldig siger. Her må det trenast, om vi skal kunne yppe mot Odda og Rosendal etter haustferien.

1-0 (1 minutt) Tristan

1-1 (24 minutt) Abdisalan 

1-2 (29 minutt) Mohammed A.

1-3 (57 minutt) Brage K.

2-3 (59 minutt) Emil S.

Dommar: Hallvar Saghaug - stødig som alltid

Trio Husnes sitt lag: 

Gunnar Eikemo Steine, Michael Løland, Andre Nordøy, Edvard Andre Nessestrand Ingvaldsen, Brage Kvandal, Noah Smith, Mohammed Aljajan, Mohammed Zekeriye, Elias Ulbi, Vegar Seljelid Joleik, Emil Gjuvsland, Jonas Hjelmeland, Mikal Røssland, Abdisalan Zekeriye.