Målorgie i serieavslutninga

Det skal vi vera nøgde med, for vi har utvikla oss mykje gjennom sesongen. Særleg offensivt har vi fått mykje meir tempo i spelet og vi kan notere oss 36 mål i haustsesongen. Det etter å ha 7 strake (knappe) tap og berre 13 scoringar i vår.

I dag kom vi dårleg i gang og første 10-15 minutta hadde eit temposterkt Bremnes trøkket mot oss. Aref varta opp med fleire gode redningar, der særleg susaren han fekk fista i stolpen var klasse. Måten vi fekk 0-1 på var derimot ussel. Fullstendig svikt i dekkinga på corner, det skulle vi klart å unngå. 

Etter kvart kjempa vi oss inn i kampen og skapte ein del sjansar. Daniel skaut like utanfor og det gjorde Ruben også, då Sander kom rundt og la inn. Bremnes fekk 0-2 på eit frispark etter halvtimen, men vi hadde mot slutten ein rein kanonade mot bortemålet utan å lukkast. Ruben, Samson og Rasmus sine avslutningar vart alle redda på strek. 0-2 midtvegs.

Frå start av andre omgang var det dags for eit etterlengta come back. Henning har vore ute med skade nesten heile sesongen, og fekk vel ein halvtime på banen i midtforsvaret. Til dei grader spelesugen som han var, var han også ein god del andre stader enn der. Kjekt også at han fekk seg ei scoring, då han framviste mykje vilje i feltet etter corner.

Men før det reduserte Sander til 1-2 på eit herleg angrep. Mathias førte opp på venstre og fann Ruben, som slo hardt inn framom mål, der toppscoraren vår var på plass. Men Bremnes svarte med 1-3 minuttet etter. Kort etter hadde spissduoen vår byta roller, men då gjekk Ruben sitt skot like utanfor.

1-4 kom på ein uheldig keeperinngripen, men vi meldte oss på att då Edvin fann Sander med ei strålande pasning. 2-4, før Bremnes på ny svara få minutt etter. Så kom Henning si redusering til 3-5 og vi la opp til å sende ein ekstra mann opp på topp siste kvarteret. Men vi hadde ikkje eingong fått han fram, før Bremnes la på til 3-6 på ei kontring. 

Då gjekk lufta ut av den potensielle sluttspurten. Ruben reduserte med ein susar frå 20 meter, og Daniel hadde eit skot i tverrliggaren, men kampen endte 4-6. Fortent nok, Bremnes var eit hakk betre enn oss i dag. Alt i alt ein god og fartsfylt kamp, så vi kan vera brukande nøgde med serieavslutninga.

Mathias gjorde nok ein gong ein sterk kamp og har vist imponerande haustform. Han var vår beste i lag med Ruben, som i lag med Sander på topp er ei pest og ei plage for eit kvart forsvar. Til slutt god omtale av kampens stødige dommar, 16-årige Annika Guddal, som meistra eldre spelarar og høgt tempo veldig bra. Her har vi eit stort dommartalent. 

0-1 (6 min)

0-2 (27 min)

1-2 (51 min) Sander Dolonen Brækken

1-3 (52 min)

1-4 (62 min)

2-4 (68 min) Sander Dolonen Brækken

2-5 (71 min)

3-5 (74 min) Henning Solheim

3-6 (78 min)

4-6 (88 min) Ruben Saug

Dommar: Annika Øye Guddal, Rosendal

Gult kort: Sander Eik Vevik og eitt til Bremnes

Trio sitt lag (3-5-2): 
Aref Hosseinizada, Edvin Vågen Bjørgvik, Sander Eik Vevik, Tarmo Tars - Ole Martin Byrknes, Samson Nyrud Uppheim, Espen Aakre Sjo, Daniel Sørtveit, Mathias Gjelseng - Sander Dolonen Brækken, Ruben Saug, Rasmus Eik Sjo, Benjamin Skarveland, Tormod Sund Vårdal, Henning Solheim.