Imponerande løpsprestasjonar

Det er over tid bygd opp eit flott triathlon- og løparmiljø i Trio og no seinhausten har det vore mange prestasjonar på høgt nivå. Ein ny i rekkja sterke tider leverte Holmfridur Adalsteinsdottir i dag, med 3.04 i Frankfurt Marathon!

3.04.48 var tida til Holmfridur (43), og den spreke dama frå Valen sette med det ein imponerande pers. Det tilsvarar ei snittfart på om lag 4.20 min pr km i samfulle 42 kilometer!

Og det skjedde berre ei veke etter at Trioguten Erlend Nymark Jensen (25, representerer Bergen løpeklubb) leverte ei kanontid i Amsterdam Marathon. 2.29.12 var tida hans, og då er kilometertida ganske nøyaktig 3.30 min.

Nemner også Terje Røssland Nes (46), som sette ein solid personleg rekord med 1.32.43 på halvmarathon i Bergen Maraton på Fana sist helg, noko som tilsvarar ca 4.25 min/km.

Neste helg er det NM i halvmarathon i Stavanger (3-sjøersløpet), og også der er det Trioløparar på startstreken.

I dag har elles kenyanaren Abraham Kiptum sprunge tidenes raskaste halvmarathon. I Valencia halvmarathon noterte han seg for sinnsvake 58.19, noko som tilsvarar 2.45 min på km(!) Her var det nesten 14.000 deltakarar. Så vidt vi veit, har Kiptum ingenting med Trio å gjere :)


	Tilbake