Tøff kamp på Sotra

Klubbane ligg tett på Sotra og etter etableringa av Sotra SK for ei god handfull år sidan, så eksisterer ikkje Hald lenger. Men på Hald stadion spelar Sund SK heimekampane sine. Dei har dog ikkje anna jentelag i klubben enn dette damelaget, som er eit samarbeidslag med Skogsvåg, som er klubben som satsar på jentefotball. I praksis er dette laget juniorspelarar frå Skogsvåg og litt eldre damer frå Sund i ein fin miks. 

Ikkje ulikt oss, som er ei fin blanding av fjorårets Trio-jentelag, Halsnøy sine juniorar og ispedd nokre damer som har runda 20. Men i motsetnad til vårt nystarta lag, så hadde Sund/Skogsvåg i fjor lag i 4.divisjon, noko som endte med nedrykk. Til dagens bortetur hadde vi ein del fråver grunna skader, konfirmasjonar og anna, men likevel ingen problem med å mønstre 15 damer på tur.

Ein våt opptakt til kampen, då vatningsanlegget på kunsgrasbanen vart  skrudd på rett i fleisen på oss under oppvarminga. Vi vart pressa bakover i starten av eit velspelande og bevegeleg heimelag, som fekk utteljing etter kvarteret. Eit godt skot som Katrine slo i stolpen, og spissen var først framme på returen.

Vi samla oss etter dette, sjølv om heimelaget førte spelet. Vår beste sjanse kom då Emma vann att ballen 30 meter frå mål og spelte fram Rebekka, som skaut like utanfor langhjørnet. I staden vart det 2-0 på eit langskot.

I pausen hadde vi von om å heve oss med vinden i ryggen. I staden kom 3-0 tidleg då Kristine var hardbar og lagde straffe. Ti minutt etter reduserte vi, då Nadine vart felt ved daudlinja. God serve av Sofia og kontant i feltet av Kristine.

Men heimelaget var sterkare også etter pause og fekk to mål til, først då spissen sklitakla ballen i mål og så på nok eit langskot. På tampen kunne Emma redusert då ho kom åleine gjennom, men god redning av keeper. Dermed slutta det 5-1. Selma var vår beste spelar i dag, den vetle jenta ruvar i midtforsvaret.

Neste kamp er også borte, mot Østsiden-Askøy om to veker.

Trio sitt lag: 

Katrine Yri Røssland, Siren Njøs, Selma Kvalheim, Kristine Enæs Medhaug, Mia Høydal,  Beate Vimme, Ida Eikeland Stensletten, Sofia Televik, Emma Heggøy, Luway Kahsay, Rebekka Røen,  Sunniva Ljone Solfjell, Vilde Eide Rusten, Helene Eikenes, Nadine Morstad.